Færni til framtíðar - Upplýsingasetur um lausnaleitarnám

Þú ert hér

Hér verður safnað saman ummælum innlendra og erlendra kennara um lausnaleitarnám og fleira sem því tengist beint eða óbeint samanber ummæli dr. Ingvars Sigurgeirssonar, prófessors sem birt eru til umhugsunar fyrir þá sem eru að kynna sér nýja og breytta kennsluhætti:

Ingvar Sigurgeirsson, prófessor:
Oft er því haldið fram að í skólastarfi, einkum í grunnskólum og á bóknámsbrautum í framhaldsskólum, sé fullt af tilbúnum viðfangsefnum, nánast gerviviðfangsefnum, sem séu í litlum sem engum tengslum við raunverulegt líf utan skólans. Það er eins og það vilji gleymast að hlutverk skólans er að búa nemendur undir alvöru lífsins, líf og starf í lýðræðisþjóðfélagi eins og það heitir gjarnan á laga- og námskrármáli. Því má færa fyrir því rök að allt of lítið sé af því gert á öllum skólastigum að fá nemendum raunveruleg viðfangsefni að glíma við. [>>Nánar]

Erla Kristjánsdóttir, lektor:
Ég tel lausnaleitarnám mjög góða aðferð, sérstaklega í starfsmenntunarnámi. Það er einkar hentug aðferð til að tengja fræðilega lesningu við raunveruleikann og til að nemendur nái tökum á því að nýta raunhæft lesefni (og upplýsingar) í starfi. Ég er þeirrar skoðunar að próf séu úreld fyrirbæri en að það sé nauðsynlegt fyrir bæði kennara og nemendur að hafa námsmat. Ég hef notað lausnaleit með nemendum á 1. misseri í staðbundnu námi og á 3. misseri í fjarnámi. Í báðum tilvikum leita nemendur nauðsynlegra upplýsinga á Netinu til viðbótar við lesefni námskeiðanna.

María Björg Kristjánsdóttir og Sigurlaug Kristmannsdóttir, líffræðikennarar:
Við höfum reynt að hafa fjölbreytileika í kennsluaðferðum og verkefnum og liður í því er að nota leitarnámsaðferðir. Við höfum notað verkefni sem byggja á lausnaleitarnámi í Nát103, aðallega í tengslum við vist-og umhverfisfræði. Hér má sjá dæmi um slík verkefni. Í upphafi setjum við fram tiltekin viðfangsefni sem krefjast úrlausna. Við höfum leitast við að hafa viðfangsefni raunveruleikatengd en það er aðalgaldurinn að búa til verkefni sem vekja áhuga nemenda og örva þá til upplýsingaleitar. [>>Nánar]

Kurt Burch, Assistant Professor:
„Lausnaleitarnám er kennsluaðferð sem umbreytir þeirri kennslu sem fram fer í skólastofunni yfir í nám" segir Kurt Burch (2001) kennari við University of Delaware. Máli sínu til stuðnings vitnar hann í kennslufræðilegar rannsóknir sem sýna fram á að virkt nám [active learning] sé árangursríkasta aðferðin til að læra, beita, samþætta og varðveita upplýsingar. Einnig, að flestir nemendur kjósi frekar að stunda virkt, vandamiðað nám vegna þess að það gerir þeim kleift að halda utan um upplýsingar í þeirri röð sem þeir kjósa [from concrete to abstract] (Burch, 2001).

______
Heimild:
Burch, Kurt (2001). PBL, Politics, and Democracy. Duch, Barbara J., Groh, Susan E. og Allen, Deborah E. (ritstj.) THE POWER OF PROBLEM-BASED LEARNING. Sterling, VA: Stylus Publishing, Inc.
Erla Kristjánsdóttir (2003). Tölvupóstur 28. apríl 2003.
Ingvar Sigurgeirsson (1999). Litróf kennsluaðferðanna. Reykjavík. Æskan h.f. blaða- og bókaútgáfa.
María Björg Kristjánsdóttir og Sigurlaug Kristmannsdóttir (2003). Tölvupóstur 2. apríl 2003.

Upp