Færni til framtíðar - Upplýsingasetur um lausnaleitarnám

Þú ert hér

Hversu stórt er of stórt?

Vandamálum haldið innan skynsamlegra marka

Þegar byrjað er að beita lausnaleitarnámi [PBL] í kennslu þá er nauðsynlegt að sníða sér stakk eftir vexti með því að byrja smátt. Það er til dæmis ekki möguleiki að láta nemendur taka á heimsfriðnum í tveimur verklotum - né á heilu ári ef út í það er farið!
Hins vegar ætti að vera mögulegt að setja fram vandamál sem hægt er að leysa á 3-5 klukkustundum eða á einni kennsluviku.

Hvernig er hægt að halda vandamálinu innan marka?

[Eftirfarandi dæmi sem tekið er úr kennaranámi gefur vísbendingu um hvað átt er við hér. Ráðleggingarnar myndu til dæmis nýtast í félagsfræði, sálfræði, líffræði, jarðfræði, vistfræði og fleiri greinum sem snerta umhverfi okkar]

1. Látið vandamálið gerast á heimasvæði!

Ráð: Notið nærtækt málefni sem nemendur vita þegar eitthvað um - jafnvel eins nærtækt og skólabygginguna ykkar. Málefni sem eru persónuleg og nálægt heimaslóðum eru viðráðanlegri OG taka styttri tíma að rannsaka.
Dæmi: Í stað þess að láta kennaranema rannsaka sérstakt kennslufræðilegt málefni sem snertir alla þjóðina, notið þá umræðu eða fréttir um kennslufræðileg málefni sem er að finna t.d. í Degi á Akureyri fari námið fram þar.

2. Einbeitið ykkur að afmörkuðum hluta málefnisins

Ráð: Rissið upp kort/vef yfir efni vandamálsins. Dragið síðan hring utan um lítinn hluta kortsins og notið það sem fellur innan hans fyrir vandamálið sem er á dagskrá .

Dæmi: Í stað þess að biðja kennaranema að rannsaka allt námsmatið í skólanum, látið þá heldur koma með viðeigandi breytingatillögur við núverandi fyrirkomulag á birtingu námsmats.

3. Hugleiðið hlutverk og ástand

Ráð: Veljið hlutverk sem fær nemendur til að rannsaka málefnið frá þröngu sjónarhorni eða ástandi sem við eðlilegar aðstæður er takmörk sett.

Dæmi: Eigendur fyrirtækja sem eru að móta tillögu um útþenslu á einhverju sviði geta afmarkað sig betur en t.d. meðlimir borgarráðs sem verða að taka tillit til fjölmargra þátta áður en þeir geta hafist handa við tillögugerð.

4. Hafið tímamörk á verkskilum [sanngjörn og viðeigandi]

Ráð: Hugleiðið sambærilegt hlutverk og ástand þar sem tímamörk eru eðlilegur hlutur og verið viss um að vandamálið sé ekki of viðamikið til að nemendur geti fundið viðunandi lausn innan settra tímamarka.

Dæmi: Kennaranemar í hlutverki skólastjóra svo dæmi sé tekið gætu þurft að leggja fram breytingatillögu vegna námsmats á fyrirfram ákveðnum degi.

5. Látið nemendur fá meiri upplýsingar

Ráð: Með því að láta nemendur fá upplýsingar um heimildir [Resources] í kennslustundum styttist tíminn hjá þeim sem fer í að safna upplýsingum og deila þeim með öðrum í hópnum. Verið samt mjög varkár! Við viljum ekki að lausnaleitarnám verði enn ein kennaramiðaða kennsluaðferðin! Það að leita upplýsinga er jú hluti af lausnaleitarferlinu.

Dæmi: Látið hvern hóp fá yfirlitsmöppu með ábendingum um heimildir til að vinna eftir. Nemendum er samt sem áður frjálst að nota viðbótarupplýsingar sem þeir nálgast á bókasöfnum og Netinu.

________
Heimildir:
© Sage, Sara (2002). Dreifirit á námskeiði Sage á ráðstefnunni PBL 2002 - A Pathway To Better Learning í Baltimore [þýtt og staðfært af ÞÓ með leyfi höfundar]

Upp