Færni til framtíðar - Upplýsingasetur um lausnaleitarnám

Þú ert hér

[Metacognition]	[Learning to learn]

Gott skipulag og árangursríkar námsaðferðir
eru undirstaða góðs námsárangurs.

Með því að nálgast námið á skipulegan og sjálfstæðan hátt og tileinka sér bestu námstækni, læra nemendur rétt vinnulag og verða þar með farsælir námsmenn.

Nám er mjög einstaklingsbundið. Það er ekki til sú námsaðferð eða námstækni sem hentar öllum og við allar aðstæður. Þar af leiðandi gengur aðferðin við að læra að læra út á það að átta sig á því hvað við vitum og hvað við vitum ekki um leið og við komumst að því hvað við getum gert til að ráða bót á því. Til að tileinka sér góða námstækni er nauðsynlegt að:

axla aukna ábyrgð á eigin námi
nýta tímann vel og halda sér við efnið
leita aðstoðar við að nálgast verk/verkefni á sem auðveldastan hátt
vera búinn að afla sér þeirrar þekkingar og hæfni sem nauðsynleg er í byrjun verks/verkefnis, fylgja því eftir með því að læra meira og ljúka síðan við að leysa það
viða að sér fjölbreytilegri þekkingu og heimildum
hafa hugrekki til að gera sér ljóst hvenær og hverja á að biðja um hjálp

Það hefst með því að:

1. Læra að þekkja sjálfan sig

Byrjið á því að gera ykkur hreinskilningslega grein fyrir eigin styrk og veikleika hvað varðar almenna hæfileika til náms í framhaldsskóla eða háskóla sem er lestur, skrift, hlustun, stærðfræði - og náms/vinnulags sem er skipulag, tímastjórnun, einbeiting, hlustun og glósugerð.

Næst er að skilgreina hvernig ykkur finnst best að læra. Margir þættir hafa áhrif á nám, hugleiðið hvort þið lærið best með því að lesa, horfa, hlusta eða framkvæma? Ennfremur er nauðsynlegt að kynna sér kennsluaðferðir kennarans svo þið getið tileinkað ykkur bestu námsaðferðir til að ná sem bestum árangri.

Þessu til viðbótar, ættuð þið að hugleiða hvenær [Eruð þið morgunhanar eða nátthrafnar?] og hvar [Hvort einbeitið þið ykkur betur í björtu hávaðasömu herbergi eða í þægilegu, hljóðlátu horni?] þið eruð best upplögð til að læra.

2. Stjórna tíma sínum og lífi

Fyrsta skrefið í náminu er að hafa stjórn á tímanum - skipuleggja eigið líf - og skilgreina hvaða markmið þið hafið og síðan að raða hlutunum í forgangsröð svo þið eigið betra með að ná settu marki.

Skoða hvernig þið notið tímann. Ef þið verjið ekki tímanum í það sem á að vera í fyrirrúmi - þá verðið þið að gera nauðsynlegar breytingar þar á - að öðrum kosti tekst ykkur ekki að ná settu marki. Ef skólinn, námið og góðar einkunnir eru fyrst á dagskrá hjá ykkur - þá verðið þið að búa til og fylgja tímaáætlun sem gefur ykkur nægan tíma til að stunda námið með því að sækja tíma og læra.

3. Auka einbeitingu

Góðir nemendur verja ekki endilega meiri tíma í að læra samanborið við lélega nemendur - aftur á móti nýta þeir námstímann óneitanlega á áhrifaríkari hátt.
Lærið að beina athyglinni aðeins að því verkefni sem er í gangi hverju sinni - lærið að einbeita ykkur! Þegar þið eruð í tíma eða eruð tilbúin til að læra, beinið þá óskiptri athygli ykkar að því.
Og munið að forsenda þess að muna er hversu vel þið lærið eitthvað, ekki hve fljót þið eruð að læra það. Þið verðið “að innbyrða” eitthvað áður en þið “gleymið” því.

4. Vita hvað er nám og hvernig það fer fram

Nám er meira en aðeins að fara í tíma og vinna heimavinnu. Það er í raun fjórskipt hringrás:

forskoðun >> kennslustund >> endurskoðun/upprifjun >> nám
[ preview >> class >> review >> study ]

Þegar þið byggið upp vanabundinn námshring tekst ykkur að læra meira á styttri tíma og álagið verður minna.

Meira um það hvernig á að læra að læra:

5. Koma sér upp góðum orðaforða

Enskan er auðugasta tungumálið í heiminum hvað orðaforða snertir (sjá t.d. Speaking of Language). Sérhvert orð er tákn sem stendur fyrir hugmynd eða hlut. Hæfileikinn til að skilja þýðingu þeirra orða sem aðrir nota og velja réttu orðin til að miðla hugmyndum, upplýsingum og tilfinningum til annarra er mjög mikilvægur í árangursríku námi.
Til að koma sér upp góðum orðaforða þarf maður að vera næmur fyrir orðum og orðasamböndum, koma sér upp tækni til að skilja merkingu nýrra orða ásamt aðferð til að leggja ný orð og þýðingu þeirra á minnið.

6. Þjálfa góða lestrartækni

Hafið þið nokkurn tímann sofnað á meðan þið leikið tennis eða horfið á uppáhalds sjónvarpsþáttinn ykkar?
Sennilega ekki? - En þegar lestur á í hlut?
Sennilega. - Hver er munurinn?
Ef þið eruð þátttakendur, líkamlega eða andlega þá eruð þið áhugasöm og haldið athyglinni. Þegar þið eruð óvirk þá missið þið fljótlega áhugann og farið að hugsa um annað.
Til þess að læra með því að rannsaka/lesa efni verður maður að vera virkur, hugsandi þátttakandi í ferlinu ekki óvirkur áhorfandi. Skoðið alltaf efnið sem í hlut á og verið viss um að hvert verkefni hafi sérstakan tilgang. Verið virkir lesendur svo tilganginum sé náð og svarið spurningum um efnið. Haldið ykkur við efnið með því að kanna reglulega hvað þið hafið lesið.

7. Þjálfa ritfærni

Að lýsa hugmyndum sínum á skilmerkilegan hátt krefst ekki aðeins hæfileika til skrifa heldur líka óskiptrar athygli, ígrundaðrar hugsunar og virkrar þátttöku. Aðeins virkum þátttakendum í skriftarferlinu tekst að koma hugmyndum sínum skýrt á framfæri.
Skrifin verða að:

hafa tilgang

byggjast á ákveðinni hugmynd eða kenningu

byggjast á skipulagðri þróun hugmynda meira og minna rökstuddri

byggjast á rökrænni niðurstöðu

8. Þróa hlustunarhæfileika og glósutækni

Með því að hlusta á réttan hátt á fyrirlestur og ákveða hvað er mikilvægt þarf að tileinka sér tvenns konar hæfileika áður en upplýsingar eru skrifaðar niður. Enn og aftur er lögð áhersla á það að lykillinn að velgengni í námi er að vera virkur en ekki óvirkur þátttakandi.

Góð glósugerð krefst þess að nemendur:

undirbúi sig fyrir tíma

séu virkir hlustendur

geri greinarmun á aðal- og aukaatriðum

noti sérstakt kerfi til að glósa

taki þátt í því sem fram fer í tímanum

endurskoði reglulega

9. Vita hvernig á að læra fyrir próf og taka próf

Próf eru til að sýna kennurum hversu mikið nemendur hafa lært. Með því að undirbúa sig undir próf öðlast þeir dýpri skilning á efninu, fyrirbyggja kvíða og hækka einkunnir sínar.

Best er að leita eins mikilla upplýsinga um prófið og hægt er, læra og endurskoða efnið í nokkurn tíma [nota síðasta kvöldið fyrir próf fyrir upprifjun ekki stífan lestur], vinna skipulega að úrlausn prófsins og fara yfir prófið með kennaranum sínum þegar hann er búinn að gefa því einkunn.

10. Takast á við hvert námskeið fyrir sig

Það er ekki hægt að fá eitthvað fyrir ekkert. Aftur á móti er hægt að fá ekkert fyrir eitthvað og er það einmitt sá afrakstur sem fæst út úr hverju námskeiði ef það eina sem gefið er í það eru peningar [t.d. í formi skólagjalda, greiðslu á uppihaldi o.s.frv.].

Sönn kennsla sem stendur undir nafni er ekki aðeins það að troða einhverju efni í heilann á nemendum. Sönn kennsla er það ferli sem felst í því að efla hæfileika nemenda til að komast áfram í lífinu.

Kennarar geta aðeins skipulagt námið en til að úr verði nám þá verða nemendur að bera ábyrgð á eigin athöfnum.

Upp