Ég heiti Þórunn Óskarsdóttir og hef kennt tölvu- og upplýsingatækni við Fjölbrautaskólann við Ármúla undanfarin 17 ár. Auk þess hef ég kennt á símenntunarnámskeiðum fyrir kennara og ýmsar heilbrigðisstéttir á vegum Fjölbrautaskólans við Ármúla, Endurmenntunar Háskóla Íslands, FRAMVEGIS - Miðstöðvar um símenntun í Reykjavík og fleiri stofnana. Jafnframt vann ég í hlutastarfi við Kennslumiðstöð Háskóla Íslands í tæp fjögur ár (1999-2003) þar sem ég annaðist kennslu og kynningar fyrir háskólakennara þar sem lögð var áhersla á nútímalegar aðferðir í kennsluháttum. 

Haustið 1998 hóf ég framhaldsnám við Kennaraháskóla Íslands og lauk þaðan meistaraprófi haustið 2003. Meistaraprófsverkefnið sem ber nafnið Færni til framtíðar - Upplýsingasetur um lausnaleitarnám er tvíþætt annars vegar samnefnt upplýsingasetur og hins vegar fræðileg greinargerð þar sem gerð er nánari grein fyrir megineinkennum og markmiðum lausnaleitarnáms. 

Við gerð vefsetursins hef ég haft að leiðarljósið að í boði séu sem fjölbreyttastar upplýsingar um lausnaleitarnám sem í fljótu bragði gefa góða innsýn í aðferðina. Síðan er hægt – ef áhugi er fyrir hendi - að afla sér nánari upplýsinga um lausnaleitarnám annað hvort með því að skoða þær vefslóðir og bækur sem bent er á eða með því að lesa fræðilegu greinargerðina Færni til framtíðar sem hægt er að nálgast hér á upplýsingasetrinu. Greinargerðin er sett þannig upp að ekki þarf að lesa hana frá upphafi til enda til að finna það sem fólk hefur áhuga á – hægt er að smella á viðkomandi kafla og síðan undirkafla og fá upplýsingar í fljótu bragði um það sem hugurinn stendur til.

Þegar vitnað er í vefsetrið eða greinargerðina vinsamlegast afritið þá þann texta sem við á hér fyrir neðan:

Við úthlutun styrkja menntamálaráðuneytisins til námsefnisgerðar í bóklegum og verklegum námsgreinum á framhaldsskólastigi fyrir árið 2002 veittist mér sá heiður að fá styrk til verksins. Auk þess fékk Fjölbrautaskólinn við Ármúla styrk til þróunar nýrra kennsluhátta við skólann í formi lausnaleitarnáms þegar menntamálaráðuneytið úthlutaði styrkjum til þróunarverkefna í framhaldsskólum og til fullorðinsfræðslu á árinu 2001. Var hann meðal annars notaður til námskeiðahalds í lausnaleitarnámsfræðum fyrir kennara skólans vorið 2002. Hagþenkir - félag höfunda fræðirita og kennslugagna veitti jafnframt styrk til verksins við úthlutun starfsstyrkja til ritstarfa árið 2003 og 2005. Fyrir þennan stuðning ber að þakka.

Lausnaleitarnám er byggt á hugmyndum bandaríska heimspekingsins og menntafrömuðarins John Dewey (1859-1952) um nám, kennslu og menntun en margir líta á Dewey sem höfund allrar nútíma kennslufræði. Einkunnarorð hans voru Learning-by-doing.

Í bókum sínum Hugsun og menntun [How We Think] og Reynsla og menntun [Experience and Education], sem út komu í íslenskri þýðingu Gunnars Ragnarssonar árið 2000, fjallar Dewey á ítarlegan hátt um mikilvægi þess að þjálfa ígrundaða hugsun [reflective thinking] og að tengja saman nám og reynslu [learning by experience].

Að læra af reynslunni er fyrst og fremst í því fólgið að taka eftir afleiðingum athafna og finna orsakatengsl milli athafna og afleiðinga. Frummerking hugsunar felst í því að gera sér ljós þessi tengsl (John Dewey: Hugsun og menntun, 2000:29).

Í lausnaleitarnámi er lögð höfuðáhersla á þessi atriði, þ.e. að þjálfa nemendur í  ígrundaðri hugsun og að stuðla að því að þeir læri af reynslunni með því að leggja fyrir þá flókin raunveruleg vandamál til úrlausnar.

Upp

© 2000 Þórunn Óskarsdóttir, M.Ed. Allur réttur áskilinn. Vefstjóri
Síðast uppfært: 31.03.2012